Feeds:
المقالات
تعليقات

كلام عنى

الرفق والتدليل 
شعار المرحلة المقبلة 


أنا ركبت فيل وأنا صغيرة 
 فى جنينة الحيوانات عملوا مرة حاجة زى الهودج للفيل 
وطبعا كنت هاموت واركبه
ماما قالت لى هتعيطى وممكن تقعى 
بس أنا أصريت 
كنت فرحانة قوى قوى 


لما شفت ساليناز بنت أستاذ ابراهيم رزق 
ابتسمت 
المرة الأخيرة الابتسامة كانت لسبب مختلف 
لانها كانت لابسة شورت 
شبه اللى كان عندى وأنا فى سنها وأكبر منها كمان 
وكنت بحبه جدا 


من أمنيات الطفولة البعيدة 
ان يكون عندنا محل ومكتبة فى نفس الوقت 
ويبقى فيهم شيبسى ولوليتا وكيمو كونو 
وقصص ملف المستقبل ورجل المستحيل 
ماهو مش معقول هاقضى حياتى 
احوش فلوس لكل الحاجات دى 


بحب المراجيح جدا 
مش الملاهى …..لأ المراجيح 
وتبقى هادية خالص 
وياسلام لو عندى فيلا وعرفت أعمل فيها مرجيحة 
مش لازم فيلا 
أنا أصلا باحب أعمل الكراسى اللى باقعد عليها مرجيحة 


العجلة 
دى الحلم اللى مش عايز يفارقنى 
أنا عايزة اركب عجلة 
ركبتها فى المصيف قبل كده بأشكال مختلفة 
وحاولت اتعلم اركب العجلة العادية 
وكانت النتيجة..
انى اتعورت انا واخويا اللى كان متطوع يعلمنى 
فزهق منى وفقد فيا الأمل 
أنا مش عايزة أركب عجلة فى المصيف 
أنا عايزة أعيش فى مدينة زى الافلام الاجنبى 
واركب العجلة عادى جدا زى بنات ثانوى 
واروح بيها لصديقاتى 
وأجيب حاجات من السوبر ماركت 
وتبقى شىء طبيعى فى حياتى 
مش استثناء 


القرد أحلى ولا الغزال ؟
القرد طبعا 
دى اجابتى العبقرية على دلع ماما ليا وأنا صغيرة 
رشا يعنى بنت الغزال 
تبقى غزال 
ويبقى السؤال من تانى 
القرد أحلى ولا الغزال 
وقتها ….
الغزال مكانش ليه أى مكان فى قلبى ولا عقلى 
القرد بس هو اللى كان مسيطر على كل وجدانى 


كنت لوحدى ساعتها 
وكنت خايفة من نتيجة الأشعة 
ومستغربة من شكل الجهاز كمان 
ولما الدكتور بدأ كنت قلقانة قوى
كنت عايزة أستغيث بربنا 
وأقول 
لا إله الا أنت سبحانك انى كنت من الظالمين 
بس ابتسمت
ونسيت كل خوفى وقلقى 
لما لقتنى باقول 
سبحان الذى سخر لنا هذا وماكنا له مقرنين 
وبكررها كتير من غير مااخد بالى 
حسيت تقريبا انى راكبة طيارة :))


لا إله الا أنت سبحانك انى كنت من الظالمين 
آية الانقاذ بالنسبة لى 
من كتر المواقف الصعبة اللى انقذنى منها ربنا 
بعد ماقلت الآية دى 
بقيت حتى وأنا بحلم بكابوس 
الاقينى قلتها وكل حاجة تنتهى وتخلص بسهولة 
لا إله الا أنت سبحانك انى كنت من الظالمين 
Advertisements

العار

هحاول التزم بأقصى درجات ضبط النفس 

بيان العسكر والاحزاب ولا يلزمنى ولا يهمنى 
أنا ماوكلتش حد ولا فوضت حد يتكلم باسمى 
ليهم مصالح مع العسكر وباعوا الثورة علشانها ؟؟
يتحرقوا بجاز موضوع ميخصنيش 
الانتخابات أهم عندهم من بلد كان نفسنا نفرح بيها ؟؟
مشكلتهم انهم باعوا لكن  مش مشكلتى 

أنا مش موافقة على ولا حرف فى بيان العار اللى مضوا عليه 
بتذلوا أنفاسنا بقالنا اد كده
 وفى الاخر رايحين توافقوا على بيان مايوافقش عليه عيل صغير ؟؟

أول مرة الاقى الخيانة اللى كنت بشوفها فى كتب التاريخ 
طالعة وبتتجسد قدامى 
ببساطة كده !!
يانهاركو اسود 
مجلس شعب ينعقد فى يناير 
ومجلس شورى فى مارس 
ولسه هنفكر نختار لجنة دستور فى ابريل 
وريس فى علم الغيب
 لما تبقى تظهر نتيجة استفتاءالدستور  
ولازمته ايه الريس بقى ..احنا هنبص لبره وابوبدلة جاهز ومستعد 
ايه ده 
انتم مش بتتكسفوا 
مفيش دم 
مفيش احساس ولا ضمير 
طب مش بتفهموا الله يخرب بيوتكم انكم اتفضحتوا 
طب مين هينتخبكم ؟؟
هتخرجوا تكلموا الناس تقولوا ايه بعد العار اللى وافقتوا عليه 

المادة الخامسة ؟؟؟؟
أقصى أمانيكم المادة الخامسة وتكسبوا الانتخابات 

الاخوان والسلفيين وخصوصا الاخوة فى حزب النور
مش كنتم خايفين على شرع ربنا ومصر اسلامية 
اسلامية دلوقت مش كده ؟؟
اسلامية لما الناس ماتت علشان بلد أحسن 
وأنا أبيع البلد للعسكر علشان كرسى فى برلمان 
اسلامية آه 
اسلامية لما كنتم هتموتوا
 علشان بيفرضوا عليكم مبادىء فوق دستورية 
وانتو حالفين يمين مغلظ ماتخالفوا الشرعية 
اسلامية فعلا 
اسلامية لما استهبل واستعبط 
واعمل نفسى مش واخد بالى 
واحط ايدى فى ايد العسكر أكبر خطر على الثورة علشان برلمان 
اسلامية لما انزل التحرير بعد سبع شهور من الثورة 
علشان أهتف للشريعة وارفض الالتفاف على الشرعية 
وفى قعدة واحدة ولا بقى فيه شريعة ولا شرعية 
فيه انتخابات ..
حلوة الانتخابات 
كان فاهمكم مبارك والله 
وعارف حجمكم وأولكم واخركم
كان فاهمكم مبارك واحنا عايشين معاكم مش فاهمين 

أنا بس مش عايزة ايديا ولسانى يطاوعونى 
انى أقول كلام اتكسف لما أشوفه مكتوب بعد كده 

طب مجلس العسكر وفاهمينه ومش جديدة علينا تصرفاته 
لكن ياعالم 
هيبقى يدرس الغاء الطوارىء 
وهيبقى يدرس قانون العزل 

يانهار مش فايت 
هى الليلة دى هتعدى علينا كده 

أنا حاسة انى بسمع مبارك تانى بيقول سأظل 


شغلت نفسى فى استرجاع حالى بعد حادثة البدلة 
لغاية ماشفت اخر فيديو تعذيب على فيس بوك 

ايه ده 
هو اللى بيسمح لنفسه يضرب ويكهرب ويهين أى كائن حى
 ممكن نعتبره كائن حى برضه !
ولا هو بيوصلنا رسالة ان اللى يقدر على حاجة يعملها 
طب مااحنا سيادتك قدرنا من كام شهر كده ولا نسيت 


ايه كم الاستمتاع اللى كانوا حاسين بيه 
وكان ظاهر على شكلهم وتصرفاتهم طول الوقت !!
هى الناس دى ينفع تتعامل مع البشرمن غير حواجز كده ؟؟
دول خلاص عدوا مرحلة ان التأهيل النفسى ممكن يجيب نتيجة معاهم 


طب محدش بلغهم ان البلد دى قامت فيها ثورة 
وفى يوم عيد الشرطة كمان
وكان من أهم أسبابها لا انسانيتهم فى المعاملة 
ولا نسيوا يوم الهروب العظيم فى 28 يناير 


ولا المسلسل البايخ أحداثه بقت بتجرى بسرعة كده ليه 
وتفعيل الطوارىء فتح نفس الداخلية للشغل قوى 
ماهو أصل فيه ناس كده بتتخنق من جو الحرية 
ومتعرفش تعيش ولا تشتغل الا فى جو الارهاب 
ارهاب غيرهم طبعا 


طب وبالنسبة للاخوة فى  الجيش 
ايه يعنى 
ايه النظام ؟
هو حضراتكم برضه علموكم فى الكلية الحربية 
ضرب القفا للمواطن المصرى يبقى ازاى؟
وايه أفضل السبل لكهربته علشان يعترف 

أنا حاسة ان الثورة كانت فرصة جميلة
 لتحسين العلاقات وإزالة الضغائن القديمة مع الشرطة 

وبعدين هو الضرب بالقفا لذيذ …صح ؟؟
كهربة البلطجى ممتعة ؟؟

انك تضرب بمنتهى البشاعة واحد ميقدرش يضربك
 دى حاجة بتسعدك ؟؟…واضح يافندم 
 أصل اللى ميعرفش من الاساس معنى الانسانية.
نعلمهم احنا الانسانية ازاى 


البشاعة الحقيقية بقى 
انك تلاقى التعليقات من عينة يستاهلوا 
ده بلطجى واللى بيتعمل فيه حلال 
هنا بقى بلاقينى تعبت بجد 
ماهو مينفعش نفضل نهاتى طول عمرنا كده 

هو مش حضراتنا برضه أتباع ديانات سماوية 
فى الكتاب المقدس لحد فينا
 كلام عن تعذيب البلطجى وانتهاك انسانيته ؟؟
أصل أنا واثقة ان اللى بيعبد بقرة 
هيتكسف يكتب فى كتابه عنها ان تعذيب البلطجى  حلال 

البلطجى ياسادة والسفاح والارهابى 
وكل التوصيفات اللى ممكن تخطر على بالكم 
مش الحق ولا الصح ولا الانسانية 
مهما كانت جريمتهم انهم يتعذبوا 

الدين كما أفهمه حضراتكم 
انهم يروحوا لقاضى 
والقاضى لو استقر فى يقينه جرمهم
يحكم بحكم ربنا فيهم 
الحكم الشرعى معروف 
ومش بيحكم بيه خريج شرطة أو حربية 

البلد دى عمرها ماهتحس ان قامت فيها ثورة 
الا لما الكل يتعامل نفس المعاملة 
اللى اسمها إنسانية دى 
بمزاج حضراتكم أو غصب عنكم 
صدقونى بمزاجكم أو غصب عنكم 

على فكرة أنا مكنتش موافقة 
على ربط بلطجية التحرير على النخل 
ولا ضربهم وتعذيبهم 
واللى عرفته ان كتير من الثوار كانوا رافضين الفعل ده 


من قال لا فلم يمت 
وظل روحاً أبدية الألم 

————

ممكن تستوعب يامجلس العسكر 
لو قلت لك 
ان روحى مخنوقة من وجودك 
وانى اكتشفت ان مجرد متابعة أخبارك 
فضلا عن مناقشتها 
والقلق من تصرفاتك على البلد 
اللى هنفرح بيها بإذن الله
بيقضى كل يوم على جزء من روحى 
و انى معنديش غير روح واحدة 
وخايفة حتى بعد ماتمشى 
معرفش ارجع اللى ضاع منها بسببك 

————–

يارب تكون الغُمة دى 
زى أجواء الخطاب التالت و(سأظل )
وفرجك دايما قريب يارب 


برغم كل الظروف والملابسات
 والعوائق والمشاكل ومواعيد القطارات …..الخ 

لكن فى مكان بعيد قوى فى قلبى 
أنا عندى  يقين انى هقابلك 
اليقين ده لقيته فى قلبى بإرادة الهية 
ومش هقابلك وبس 
لأ ده أنا هقابلك و هنبقى متفاهمين
 وفى منتهى السعادة  وهنكمل حياتنا سوا ان شاء الله 
هقابلك امتى وفين وازاى وحياة ايه اللى هنكملها سوا؟؟
 وايه مبررات ومسوغات السعادة دى ؟؟
كل دى  تفاصيل مش مهتمة بيها أبدا
 القطعة البعيدة جدا فى قلبى اللى انت هناك فيها 

حياتى العادية
 أنا بحاول بكل الطرق ابعد فيها شبحك عنى ..
اشتغل شوية ..اذاكر شوية
طول الوقت بحاول اشغل نفسى بكل حاجة غيرك
 وبقنع نفسى انى عرفت ارتب اولوياتى ووقتى 
واظبط حياتى على الوضع اياه
 اللى أنا معترفة انه مش عاجبنى بس لازم ابقى راضية بيه 
وان عدم وجودك  فى حياتى دى حاجة مش كويسة أبدا
 بس أنا شاطرة وعرفت اتكيف معاها 

بس باعترف لنفسى أحيانا بينى وبينها  انى بكدب عليها
 مع كل شرارة حب بالمحها  بين اتنين بافتكرك
مع كل حزن بحسه  من ألم فراق اتنين 
كان نفسهم يكملوا سوا 
مع الرغبة القوية جدا جوايا
 ان يكون لى دور فى اسعاد كل حبيبين على الارض 
ياراجل ده أنا كان نفسى أكلم زهرة سليمان
واعقلها واخليها تبطل اللى بتعمله مع على البدرى 
ده أنا ساعات كان بيبقى نفسى أقابل ابو ليلى العامرية
 وأقوله يرحم ليلى وقيس من تقاليد بتقتل مش بتحيى 
ده أنا حبيت عمرو حمزاوى عشان خاطرك 

بيروحوا وييجوا 
وساعات بتبقى بينى وبينهم  مشاريع ارتباط 
وأحيانا كنت بحاول اقنع نفسى انى خلاص قابلتك 
وانك خلاص الشخص اللى قدامى 
بس نفسى دى..
 على اد مابتسمع كلامى كتير الحمد لله
على اد ماكانت بتعاند خصوصا فى الحاجة اللى تخصك 
أصلى استخارة واحلم الحلم اياه 
واعرف انه مش أنت 
واضحك على نفسى واصبر شوية 
وافوت حاجات مش عجبانى شوية 
وبعدين اقف كتير على حاجات تانية 
مش ممكن تكون هى صفاتك أبدا 

عموما
 أنا متأكدة انك عارف الكلام ده من غير ماأقوله 
ومن غير مانتقابل 
وانك طبعا موجود فى الدنيا من زمان 

بص بقى 
هو أنت لما تيجى لازم تكون عارف شوية حاجات كده 
أولها انى رخمة جدا 
ولا تتوقع انى اعترف لك بأى حاجة من الكلام ده على طول 
ده أنت هاتشوف أيام !!
طب ليه الرخامة دى ؟؟
 مش عارفة والله 
طبع بقى هانقول ايه 
وبعدين لو انت أنت 
أكيد هتبقى عارف وفاهم 
من غير ماأبقى مضطرة اتكلم 

انت هتتعامل معايا ازاى ؟؟
دى حاجة أنا مطمنة لها 
بنفس درجة اطمئنانى ليقين وجودك 

أنت هتبقى ايه فى حياتى ؟؟
لسانى مش ممكن هيعرف ينطق 
قلبى بس هو اللى هيبقى مليان امتنان 
لربنا سبحانه وتعالى 
اللى خلق القلوب والارواح 
وخلاناعرفنا اننا هنتقابل 
وان لقانا هيبقى سكن 

لأ لأ 
كده مينفعش خالص 
أنا مش هاتكلم تانى دلوقت
انت كده هتعرف عنى حاجات كتير 
أنا عايزاك تبقى عارفها لوحدك 

مين أنت ؟؟
معرفش 
فين أنت ؟؟
معرفش 

بس مش قلقانة خالص على فكرة 
أحمد الشحات 

مواطن مصرى ارتكب فعلا مبهجا 
رسم ابتسامة كبيرة فى قلبى أنا على الأقل 
مسح مرارة مسودة وجعت روحى وكرامتى

انت عملت اللى تقدر تعمله ياأحمد 
انت استغليت مواهبك وقدراتك
 فى حاجة لقيت نفسك بتعرف تعملها وبتحب تعملها 
انت اتصرفت من غير استعداد ولا أجندة مسبقة

فعلك رمزى …صح أنا موافقة 
بس من امتى الرمز مش مهم 
العلم المصرى هينزل والاسرائيلى هيرجع مكانه 
للأسف هيحصل ..
بس ده مش غلطك ياأحمد 

كل المعترضين على فعل أحمد 
ممكن يشوفوا فكرة تانية
 نستغل بيها طاقات وقلوب
الورد اللى فتح فى جناين مصر زى أحمد 

عارف ياأحمد هى حاجة واحدة بس عايزاها منك 
ماتظهرش كتير فى الاعلام ….معلش
تافهين أصلهم …
والحاجة الحلوة لما بيتكلموا فيها كتير 
حلاوتها بتقل وبتبقى ماسخة زيهم
خليك رمز زى ماأنت 
هتبقى أحلى كتير وهيعيش الرمز والأمل اكتر 

عارف طيب عجبنى ايه  تانى 
ان نفس السفارة دى
 اتبهدل الشباب عندها
 من البهوات فى الداخلية فى أول ظهور ليهم 
ويبقى الدرس المستفاد هنا 
انزل بعدد كبير …السلطة ماتقدرش عليك 
وحتى الأخطاء عندك هتقل 

كتر خيرك ياأحمد
 انك فرحتنا وفهمتنا ان الأمل كبير
 واليوم الموعود قريب ان شاء الله 

الكلام الجاى لينا بقى 
نعرف ان المشوار طويل 
علشان نوصل لليوم اللى نرفع فيه العلم المصرى 
اللى مش هينزل تانى 
نفرح باللى عمله أحمد 
بس نتعب علشان الفرحة الكبيرة 
اللى لسه طريقها طويل 

——————–

المجلس العسكرى وحكومة شرف 
يانهار أبيض على الكلام اللى كان فى بالى 
بس الطيب أحسن 
والدنيا صيام 

ينفع على الماشى كده أقولكم 

انى قبل حادثة المسودة اللى خنقتنى بجد 
ولما الاشاعات كانت مالية فيس بوك 
وحاسة ان الشياطين طالعة من تحت الارض تلعب فيه 
وقتها كان نفسى أصرخ 
(لا أسكت الله لكم حساً)

دلوقت بمنتهى الهدوء 
باقولكم 
أسكت الله حسكم أبدا
 ماانتم بتتكلموا بتفضحونا 

مسودة ايه حتى لو كانت جس نبض
مسودة !!
 مسودة!!
يعنى لما ربنا ينفخ فى صورتكم وتاخدوا رد فعل 
مجرد رد فعل رمزى وتسحبوا سفيرنا 
وكلنا عارفين انه هيرجع تانى 
ترجعوا فى كلامكم !
ده ايه العار ده 

عارفين المشكلة كانت فى ايه 
اننا بجد مكناش متوقعين منكم كتير 
ومكناش لاسمح الله طالبين حرب فى غير وقتها ولا حاجة 
بس مش كده 
ده اللواءات كانوا مصدعينا تليفونات 
وفجأة اختفوا 
استنى حد يطلع يقول حتى دى( مش حاشدة )
مفيش ….اتبخروا 
عموما 
لقد أسمعت لو ناديت حيا ..ولكن لا حياة لمن تنادى 
للأسف 

——————

عمرو حمزاوى 

مقالك الشهير خلانى احترمتك 
وأول مالفت نظرى فى المعارضة الغير موضوعية 
هى كم القسوة الرهيب اللى عندنا 
وكان سؤالى الدائم 
ليه بنعمل فى بعض كده 

اتنين بالغين 
حبوا بعض 
ظروف ما تخصهم أجبرتهم ولو مؤقتا 
مايعلنوش علاقتهم دلوقت 
حصلت حادثة …الله أعلم بأبعادها لانها مريبة 
مش عارفة بجد ازاى بنعتبر نفسنا مجتمع متدين 
لما مسكنا البنت دبحناها 

السياسى كتب مقال 
أنا شخصيا صحيت من النوم لقيته كاتب مقال 
بيقول فيه 
انه مش عايز يحرم نفسه ولا حبيبته 
من أمل فى القلب ولا بريق فى العين 
وبيوصف حبيبته انها سيدة قلبه
كفاية انه رسم على وشى وفى قلبى ابتسامة كبيرة 
مكانش بيقلل من مساحتها تدريجيا 
الا سخطى من موجة السخرية اللاذعة الغير مبررة 
والتجريح البشع اللى كان من نصيبهم هما الاتنين 
كان فيه نقد موضوعى للحالة والمقال …جميل جدا 
بس الحكاية بسيطة 
وأقول تانى 
اتنين بالغين بيحبوا بعض 
مفيش موانع شرعية تمنعهم يتجوزوا 
ساعة مانسمع عنهم 
رد الفعل الطبيعى فى رأيى 
ربنا يتمم بخير …يارب يسعدكم 
لما الاتنين يتجوزوا ويفرحوا 
ايه اللى حصل يعنى هيبوظ الدنيا 
نرحم بعض شوية …لله 
ايوه …..لله 
تحذير 
البوست غير رمضانى بالمرة 
————–

حتى صوتى وضحكتى لك فيها شى 

———-

واسعدتنى ورود سوف تهديها 

———

هامت بكِ العين لم تعرف سواكِ هوى ..من أعلم العين أن القلب يهواكِ

———-


وتسافر واسافر وأيام يطول السفر 
وقلوبنا بتتقابل مع كل طلعة قمر 
وان جت خطوتنا تغربنا 
حلاوة الشوق بتقربنا 
ومنين يجينا البعاد 
ومنين يجينا الخصام 
واحنا بين قلوبنا كل لحظة معاد 


————

اذا اكتحلت عينى بعينك لم تزل…. بخير وجلت غمرة عن فؤاديا 



—————


كل عام وأنت حبيبتى 


———-

وانى لأستغشى وما بى نعسة…. لعل خيالا منك يلقى خياليا 

—————

وأخرج من بين البيوت لعلنى ..أحدث عنك النفس ياليل خاليا 

————


حبيتها 
ايوه أنا حبيتها
 مش قادر أنسى ضحكتها 
مش يمكن دى فرحة عمرى 
والفرحة ماصدقت لقيتها 
كان فين اليوم ده غايب عنى 
كان فين 
تسلم لى وتسلم ضحكتها 


———–


صباحك سكر


——–

أشكو الى الله قلبا لاقرار له …قامت قيامته والناس أحياء 
ان نال منكم وصالا زاده سقما …كأن كل دواء عنده داء 

———— 

ولقد مررت على ديارهم… وطلولها بيد البلى نهب 
فوقفت حتى ضج من لغب…. نضوى ولج بعذلى الركب 
وتلفتت عينى فمنذ خفيت ….عنها الطلول تلفت القلب 

————-


أخاف ان تمطر الدنيا ولستِ معى 


———–

احن الى لقائك كل يوم …وأسأل عن ايابك كل وقت 
واذكر مامضى فيغيض صبرى …وتنفر عبرتى ويبوح صمتى 
ولى قلب اذا ذكر التلاقى….تظلم من يد البين المشت 

———-


فاذا وقفت أمام حسنك صامتا 
فالصمت فى حرم الجمال جمال 


———


وقرأت أقاصيص الأطفال 
دخلت قصور ملوك الجان 
وحلمت بأن تتزوجنى بنت السلطان 


————
عيون المها بين الرصافة والجسر ..جلبن الهوى من حيث أدرى ولا أدرى 

———-

تبدت لنا وسط الرصافة نخلة تناءت…… بأرض الغرب عن بلد النخل 
فقلت شبيهى فى التفرد والنوى …..وطول ابتعادى عن بنى وعن أهلى 

————–

أستشف الوجد فى صوتك آهات دفينة 

يتوارى بين أنفاسك كى لا أستبين 

لست أدرى أهو الحب الذى خفت شجونه 
أم تخوفت من اللوم فآثرت السكينة 

————–


الحب ليس رواية شرقية 
بختامها يتزوج الأبطال 


————


اذا مااستطال الدهر ياأم مالك 
فشأن المنايا القاضيات وشانيا


——–


ومهما شفت جمال ..وزار خيالى خيال 
أنت اللى شاغل البال ..انت 
انت اللى شاغل البال 
وانت اللى قلبى وروحى معاك 
وان مر يوم من غير رؤياك 
ماينحسبش من عمرى 


———-


قالى كام كلمة…
يشبهوا النسمة ..فى ليالى الصيف


———–

بانت سعاد فقلبى اليوم متبول…متيم إثرها لم يُفدَ مكبول 

———

رمت الفؤاد َمليحة عذراء ….بسهام لحظ مالهن دواء

——

كيف ياسيدتى أثبت اننى رجل أمامك
 دون أن أعشق أرضى
مثلما أعشقك حتى الشهادة

——– 

لحى الله أقواما يقولون أننا… وجدنا طوال الدهر للحب شافيا 

———-

أافترقنا أم على وشك افتراق 
وانتهينا أم لنا فى الحب راق
 كلما سارت خطانا للتلاقى
 كنت تأبى للخطى غير الفراق
ياجريحا دمه الغالى مراق 
ان جرحى فيك نار واحتراق

——– 


اذا نحن أدلجنا وأنت أمامنا 
كفى لمطايانا بذكرك هاديا 


———-
علمنى حبك أن أتصرف كالصبيان
 أن أرسم وجهك بالطبشور على الحيطان 
ياامرأة قلبت تاريخى 
انى مذبوح فيك 
من الشريان الى الشريان 


—————–


فأنت التى ان شئتِ أشقيتِ عيشتى 
وأنت التى ان شئتِ انعمت باليا 


—————-

وأصبحت عينى بعد الكرى …تقول للتسهيد لا ترحل 

———-

لئن أك أسودا فالمسك لونى …وما لسواد جلدى من دواء 
ولكن تبعد الفحشاء عنى …كبعد الأرض عن جو السماء 

———-


عانيت ..عانيت 
لاحزنى أبوح به 
ولست تدرين 
شيئا عن معاناتى 
أمشى وأضحك ياليلى مكابرة 
على أخبى عن الناس احتضاراتى
لا الناس تعرف 
ماأمرى فتعذرنى 
ولا سبيل لديهم فى مواساتى 


————-

واذا قلت مابى يابثينة قاتلى …من الحب قالت ثابت ويزيد 

———–

وأحبها وتحبنى ويحب ناقتها بعيرى 

———–

بلا ولا شى 


——-


هو صحيح ..صحيح ..؟ الهوى غلاب ؟؟
معرفش أنا 


————-
رأيت خياله فى المنام 
محلاه ياوعدى …محلاه ياوعدى 
محلاه ..محلاه 


———


شعاع أول شرارة حب 
ونظرة من بعيد لبعيد 
تقول حبيت 
ورمش يقول غلبنى الحب 
غلبنى الحب غلبنى 
ومين ينسى ..ومين يقدر فى يوم ينسى 


———–


كلمة ونظرة عين 
والقسمة وياهم 


———


خايف أقول اللى فى قلبى 
تتقل وتعاند وياى
ولو داريت عنك حبى تفضحنى عينى فى هوايا 
أنا زارنى طيفك فى منامى قبل مااحبك 
طمعنى بالوصل 
وفاتنى وانا مشغول بك 
عايز اعاتبه 
لكن خايف …
يروح يقول انى بحبك

————————————————
كل أبيات الشعر ومقاطع الاغانى دى 
من المبهجات بالنسبة لى 
ممكن يكون بعضها حزين 
لكن بتبقى جميلة قوى لما أرددها مع نفسى كتير 
مجربة ومضمونة 
لما تكون النفسويات بايظة على الاخر 
استمتعوا معايا :)