بمنتهى البساطة
الهدف الرئيسى كان إسقاط النظام
نجحنا وحققنا الهدف ده ؟
لأ طبعا ……..
فين مبارك والعائلة الكريمة ؟
فى شرم ولا الامارات ولا السعودية ولا المانيا ولافين بالظبط ؟
مش لانه وحشنى وفات اسبوعين من غير ولا حتى تليفونزى ماكتب المصرى ابو دم زى السكر فى التحرير
لكن من حقى أعرف مكانه فين وبيعمل ايه وبيقابل مين ومين بيتصل بيه وليه ..؟
.ولا بمنتهى البساطة يبعت لنا عمر سليمان يقولنا الريس ماشى
و نقوله احنا الف سلامة وخلاص على كده
ده أنا لسه معرفتش ممكن أحاكمه ازاى ..؟
———
لو احنا نجحنا فعلا فى اسقاط النظام حكومة أحمد شفيق موجوده ليه ؟
دى حكومة اختارها الرئيس السابق وحلفت اليمين فى وجوده
بالنسبة لى على الاقل هى حكومة غير شرعية ..ومش مقبول أبدا وجودها
ومع ذلك شفيق مصر على التواجد برغم ان السلطة الوحيدة فى البلد اللى بتمتلك الشرعية وهى الشعب طلبت منه الرحيل
ايه المهمة اللى شفيق مصر يمارسها مع رفضنا ليه ولوجوده ؟
وايه الاجراءات اللى اتخذتها حكومته على الاقل فى التحقيق فى موقعة البغال الشهيرة؟
وازاى يختار وزراء مكروهين وعليهم علامات استفهام كتير فى وزارتهزى سامح فهمى والاخت عائشة وابو الغيط ؟
عارفة انه استبدلهم ….لكن بعد ايه ؟
لما العادلى يتحول للجنايات فى تهمة خاصة بالاموال ..يبقى مين هيتحاكم عن الدم!!؟
وازاى وزير الدفاع يبقى عضو فى الحكومة وفى نفس الوقت هو القائد الاعلى للمجلس العسكرى اللى الرئيس المخلوع تخلى له عن سلطاته
———
ازاى وزير الداخلية بيتكلم عن عناصر أجنبية مندسة وبيحملها مسئولية قتل المتظاهرين!!
لما اسلوب الكلام لسه متغيرش وفيلم الاجندات والاصابع لسه مكسر الدنيا …ازاى أحس ان النظام سقط!!
لما الوزير ينقل مدير أمن الاسكندرية لبورسعيد يبقى أنا عملت ايه ؟
لما لغاية النهارده أنا لسه مسمعتش عن محاكمة للشرطة على مليون جريمة منها القتل والتعذيب …يبقى ثورتى كانت ليه ؟
من أول ماشفت ظابط الامن المركزى مع منى الشاذلى وأنا متأكدة ان الحال متغيرش
وان الظابط الهمام اللى اختاروه يمثل الشرطة مقدرش يدارى كل اللى جواه
وكلامه كان واضح جدا وأثبت للكل ان الشرطة بتعمل عمليات تجميل رخيصة علشان تدارى على قبحها وهل يصلح العطار ما أفسد الدهر !!
ومش عارفة الفشل الذريع للشرطة فى تسويق نفسها ده حاجة كويسة ولا لأ؟
أكيد دى حاجة كويسة علشان محدش يصدق انهم تابوا ويفكر انهم يرجعوا بسرعة
مبارك هددنا كتير بطرق مباشرة وغير مباشرة ان المقابل لرحيله هو الفوضى
ولغاية النهارده انا ماحستش ان الحال اتغير
بالعكس اللعبة اياها لسه بتتلعب علينا
البلطجية واخدين راحتهم على الاخر والناس بتصرخ من غياب الامن وبيتمنوا الشرطة ترجع بمنتهى السرعة لحمايتهم وأنا معاهم جدا فى مطلبهم الانسانى والحيوى ده
لكن لما الشرطة تفكر ترجع لازم ترجع بذكاء وبعقل وبنفسية جديدة
وقبل مايفكروا يرجعوا لازم وزير الداخلية يعتذر بالنيابة عنهم ويقدم كل مسئول عن قتل ضرب واهانة المصريين للمحاكمة
لكن لما الاقى كل قناة فضائية جايبة لى كام ظابط وصعبان عليهم نفسهم مننا ومن اللى عملناه فيهم ..مطلوب منى ساعتها انى أصدقهم وأسامحهم !!
يبقى احنا معملناش أى حاجة
لأ وكمان فى أخبار عن اعتقالات ومش فاهمة تحصل ازاى !!
الشرطة لازم تفهم ان رجوعها غير مقبول بالمرة الا لو اعتذرت وحاكمنا كل مجرم فيها
كمان لازم يخضعوا حالا وبصفة دروية بعد كده لنوع من التأهيل أو العلاج النفسى قبل تعاملهم مع المواطنين
وليه ظهرت بس الحوادث الطائفية دلوقت وماظهرتش ليه لما الشرطة البريئة اختفت !!
وجهاز أمن الدولة بيعمل ايه ؟
احنا مش اعترضنا على وجوده …..ليه مطالبنا مش تتنفذ وفورا !!؟
———
الاعلاميين رموز النفاق موجودين ليه ؟
ده أنا أول مرةأحس ان عبد الله بن سلول كان راجل طيب وابن حلال
ييجى ايه فى نفاق سرايا والقط وعبد الله كمال ولا المحور والقناة الاولى وتامر أمين
وجابر القرموطى ومنى لما تراعى مصالحها ومصالح بهجت
رأس النظام اللى سبحوا بحمده ونفذوا علشانه مقالات وصحف تعبيرية خلاص مشى
لسه موجودين فى أماكنهم ليه ؟
ومين كان بيشوف كلامهم قبل كده غيره؟
ولا متخيلين ان عندهم القدرة على التلون وعندهم أمل يكونوا رجال كل العصور
بس للأسف كانوا بينافقوا بغباء رهيب وصعب جدا ان حد يصدقهم
ده غير اتهامات الفساد الموصوم بيها بعضهم
وايه السبب اللى يخليهم مش يقدموا استقالاتهم على الاقل أو يتم وقفهم عن العمل لغاية مايتحاكموا
———
منطقيا ممكن جدا تكون حالةمبارك الصحية سيئة
لكن وأنا مالى وايه دخلى بصحته ؟
لما ابراهيم عيسى اتكلم فى الموضوع ده زمان
كانت أزمة وكان هيدخل السجن لولا الريس السابق
اللى قرر يحرم ابراهيم من فرصة انه يبقى بطل
ليه دلوقت كل الصور بتوضح سنه وحالته الصحية
ده أنا أول مرة فى حياتى المح بس ان الريس السابق شعره ممكن يبقى أبيض زينا
ده أنا كنت قربت اتعقد من الموضوع ده وأنا عمرى أقل من نصف عمره
دلوقت بيمارسوا علينا ليه نفس اللعبة الرخيصة لعبة الابتزاز العاطفى والريس كبر فى السن وعيان وهيموت ياحرام وبهدلتوه !!
للمرة الكام مضطرة أقول ان رئيس الجمهورية مش أبويا وحرام لما أخليه يعيش فى دار مسنين على البحر فى شرم بعد ماطردته من بيته
الريس موظف أفسد حياتنا وضيع كرامتنا وكرامة بلدنا تلاتين سنة
والصح انى أحاكمه على كل تصرفاته طول المدة دى
لو ليه انجازات يبقى ده شغله ونحاسبه كمان على مستوى الاداء
———
جيشنا العزيز
هحاول أنسى كل الكلام اللى سمعته عنه
وهحاول أقنع نفسى ان الجيش بكل قياداته الكبرى والصغرى مع الثورة
وهو الحامى الوحيد للثورة والجيش والشعب ايد واحدة
هعمل نفسى مش واخدة بالى من حاجات كتير تخص الجيش
وهحاسبه على انجازه فى خلال الاسبوعين اللى فاتوا
ايه المانع لما يتقدم طلب للبنوك الاجنبية بتجميد ثروة مبارك والعائلة الكريمة بمجرد تنحيه ؟
ايه المانع لما أحرم الوزراء وكل المسئولين من السفر وأخليهم تحت الاقامة الجبرية وتجميد أموالهم لحين محاكمتهم ؟
ايه المانع لما من أول يوم أحدد جدول زمنى لتنفيذ مطالب الشعب؟
معترفة ان حل البرلمان وتشكيل لجنة التعديلات الدستورية خطوات جميلة
بس أكيد الجيش فاهم انى معنديش أى ثقة فى أى فرد ينتمى للنظام السابق
ومينفعش الجيش يطلب منى أثق فيه بالكلام وبس
مش عارفة أضحك على نفسى ومش عارفة أخدعها ومطلوب من الجيش يجبرنى بافعاله اللى بتحمى الثورة زى مابيقول انى أثق فيه
———
فاهمة تمام اننا مش هنصحى من النوم نلاقى بلدنا وحياتنا كلها بقت زى الفل
وبمنتهى الامانة عارفة انى ممكن أموت قبل ماالسنين تعدى وافرح بالبلد دى بعد ماوقفت على رجليها من تانى
وفاهمة اننا لازم نصبر وان الخير اللى ناويين نبنيه ونزوده فى بلدنا محتاج وقت كتير
بس لازم نراعى ان عددكبير مننا تحت خط الفقر
وان الطبقة الوسطى عندنا فى أقصى مراحل انحدارها وان بخطوات بسيطة جدا ممكن أحسن من وضع ومعيشة الناس من غير تأثير على الاقتصاد
فيها ايه لما الجيش يسمح لاعضاء وعمال كل مؤسسة يقدموا شكواهم بطريقة متحضرة
ايه اللى هيحصل فى البلد لو مشيت فى كذا اتجاه وعملت خطط للاصلاح على المدى البعيد وفى نفس الوقت يكون عندى خطط سريعة لتحسين معيشة ملايين أى حاجة بسيطة ممكن تسعدهم وتحسسهم ان بكره أحسن كتير
———
المصريين غير المنتفعين من النظام البائد
ايه اللى جرالكم ؟
ايه كم الخوف والذعر اللى جواكم ؟
لسه مصدقين ان شباب التحرير هم السبب فى الفوضى !!
لسه مصدقين ان بينهم عناصر أجنبية ولسه بتتكلموا فى أجندات لغاية دلوقت !!
ايه كم الهلع اللى ظهر لما ضحكوا عليكم وخوفوكم باسرائيل وأمريكا !!
هو الاقتصاد كان رائع وشباب التحرير هو اللى خربه !!
السياحة كانت ممتازة والتحرير منعها واتفق مع سمك القرش ضدها !!
البورصة كنتم فاهمينها والتحرير وقفها !!
محدش سمع منكم ان النصر صبر ساعة ؟
صبرنا على الخراب تلاتين سنة ومش قادرين نصبر عليها لما تتصلح !!
ليه بتزعلوا من شعب التحرير لما بيعلى سقف مطالبه
ليه أحلامكم متواضعة ….جربوا كده تقولوا وتمشوا وتتعاملوا مع الناس بالنشيد الوطنى الجديد
ارفع راسك فوق أنت مصرى :)
جربو هتحكموا الحياة بقت أجمل ازاى ؟
جربوا وهتشوفوا بنفسكم الابتسامة مالية القلب والراس اترفعت ازاى
ليه عايزين أحلامنا قليلة
ليه سمحتم لمبارك يقتل طموحكم ويخلى قلوبكم كلها خوف وقلق وهلع وذعر
منزلتوش التحرير …شجعوا اللى نزلوا
ازاى فكرتم ولو للحظة تعتذروا لمبارك
ازاى رضيتم انه يستغلكم ويشوش عواطفكم
بيخوفكم بشوية حرامية من نظامه …وايه يعنى !
ماانتم بتتسرقوا وبيقتل فيكم من زمان
أنا مش خايفة !!؟
لأ طبعا …ده أنا شفت بسببه أيام كنت فى منتهى الرعب
لكن فين ايمانكم؟ ..فين صبركم ؟ …فين عقلكم ؟
لأ الكلام معاكم مش هينفع دلوقت
بعدين ………